مليت كثر الصبر والصبر ملي = صبري نفذ ماباقي ألا القليله
والصمت طبعي والصبر عادتلي = وعيد للفكر المعتم دليله
وسري مع الافكار واخذ وخلي = وختار منها مايناسب جزيله
وأنضاق صدري قمت أكبر وصلي = وأشكي على اللي مايخيب دخيله
وأطلب من الله حضناً يستقلي = بعزا ً على عز المعزه يشيله
والله ولي الكون دقه وجله = وعليه تيسير الفلك وتعطيله
وصبري على حكم القدر رحمتلي = كم احد بالصبر نال الفضيله
هاذي ثمان أشهر وأنا في محلي = في ماقعن مايهتني من يجيله
مايهتني لو هو على فرش زلي = وعنده معالجت النفوس العليله
ماهو الزينين النظر مدهللي= من يسكنه يكره مساه ومقيله
ما يسكنه يا كود الفقير المقلي=اللي ماله بالأمر حلن وحيلة
ومن قل ماله قل قدره وخلي=عزي لمن ضاقت عليه الوسيله
وانا الليال اللي مضن ماصفلي=يكود صفون ماتبين حصيله
ولو علم اللي من زماني حصلي=قبست من زندي براسي فتيله
والغيب لو يحكي لنا قلت قلي= وش غيب مكنون الليال الطويله
وانا بحاجة لاسعه والتسلي= اقل حاجة مثل عابر سبيله
واقبل اليا شفت الذي مقبللي= وقفي عن المقفي بعدله وميله
ليت السنين اللي مضن يرجعلي=ورجع الي فات واخذ بديله
وامشي مع الطيب واكب المولي=مع من يعزون البيوت الضليله
اصبحت من كثر الصواديف فلي=الله يعديها بستر وجميله
حاولت احل ولا بليدين حلي=يحلها وال الأمور الجليله
عجلت واسباب القدر ريضلي=وحكم القدر سهمه مايخطي فتيله
وباب الفرج لابد وقته يحلي=الله يحل الصعب والمستحيله
ومن يسهج الواجب ماهو صاحبلي=لاماشين دربه ولا منتميله
عسى معاوين السعد فزعتلي=بامر الذي له كل قوة ذليله
وشوف نجمن لسعاده مطلي=ويرجح بميزان الهموم الثقيله
وافضل صلة وصل الرفيق المسلي=اما يجيلك طوع واللاتجيله
اللي لياجيته نهضلك يهلي = وفل الحجاج بضحكتن وتهليله
حرا علي طبعه قباله يدلي= عزيز نفسي من النفوس النبيله
واللي خلقني رحمته مزبنلي =والعبد ما يشقى وربه كفيله