|
ديــــــــــــــــــــــــــوان الشاعر / سعد عواض العزيزي
قصيدة إلا رسول الله الرسول صلى الله عليه وسلم خيرمن شرقت عليه الشمس فكيف يتجرأ هؤلاء الأشرار وعبدة البقر وأكلة الخنازير على رسولنا وقدوتنا صلى الله عليه وسلم بالرسوم والصور المغرضة فهذه القصيدة بهذه المناسبة للشاعر سعد بن عواض العزيزي المطيري فإلى القصيدة : يادعوة الإسلام يادعوة الخير دعوة إلى توحيد رب البرية الله حافظها حكيم التدابيـــــر من كل تحريف ٍ ونفس ردية أرسل رسول الله إلى الخلق تيسير نزل عليه الوحي صبح وعشية نزل كلام الله ولافيه تغيير وسنة رسول الله توضح خفيه رحمة لكل الخلق نور وتبصيــــر محت ظلام الكفر والجاهليــــــة نورن على نورن يشعشع بتنويــر نمشي عليه بكل خطوة جرية وسدنا على العالم بهيبة وتقديــر وأضحى لنا في الأرض عزة قويه فيما مضى كنا نقود الطوابيــــــر وتدفع لنا الجزية بنفسن رضيـــة وإذا رفض يقتل ولافيه تأخيــــــر حتى يجي عبرة لمن سار زيـه واليوم صرنا في خطانا مواخير ركب التطور فاتنا في مجيــــه هذا ببعد العبد عن دينه يصير معرضن للمهزلة والأذيــــــة ماباقي ألا ديننا ذا ولاغير وش صارفينا يارجال الحمية واللي يعبدون البقر والخنازير يستهزئون بديننا وبنبيه أهل الرسوم المغرضة والتصاوير من حقدهم والكره والعنجهية ياما صبرنا عنهم كثير وكثير إلا رسول الله فهذي القضية يفدى الرسول اللي على نهجه يسير والروح تبذل لأجل نصره هدية صلوا عليه وسلموا ياهل الخير المصطفى المختار خير البرية "صلى الله عليه وسلم " |
قصيدة الشاعر سعد عواض العزيزي
الله خلقنا لغاية كيف ننساها * لعبادته يهدي عباده على دينه سبحان من حدد الآجال وأحصاها * أحصى حياته وميعاده على حينه كم واحدن ضيع حقوقه وما اوفاها * يقفي ويقبل يسوقنه شياطينه دنياك دنيا تغرالناس رؤياها*واللي طلب جنة المولى هي الزينة النفس ياناس في تدبير مولاها * والقلب بين اصبعيه وقبضة ايدينه والنفس أحذرك لاتتبع لها ارضاها * تبع الهوى مع طواري النية الشينة كم شخص يضحك وبين الشمس وضحاها * قالوا توفى إلى قبره مودينه هذي نهاية حياته يوم قضاها * والمشكلة كان خفت به موازينه |
سلمت اناملك اخي الغالي وصح لسان الشاعر عواض وجزاه وجزاك الله كل خير |
ماكل من يضحك مع الناس مبسوط للشاعر سعد عواض العزيزي
ماكل من يضحك من الناس مبسوط ........... الضحك بعض أحيان تخفيف ضيقة و نصيبك اللي فوق جبهتك محطوط ........... مالك هروب(ن) عنه بأية طريقة وأجلك مقدر لك مسجل ومضبوط ........... ما أنته بقادر تخره لو دقيقة وملائكة ماقلت بالصحف مخطوط ........... ويوم القيامة ينشرون الوثيقة ماينفع إلا قلب بالله مربوط ........... هو الصديق اللي وفي لصديقه |
سعد عواض العزيزي بقصيدة جديدة ( الاحساس)
الناس صارت في تبلد بالاحساس ........ ماهمهم غير الأمور التوافه ماعاد فيه لضبط الاحساس مقياس ...... الأغلبية رافعين الكلافه بنك المعرفة باقي ويعلن إفلاس ..... ماعاد أحد ينصاه يصرف صرافة اليوم عصر العولمة وضع محتاس ....... بلا رقيب ولامن الله مخافة وبعض البشر بعيونه يراقب الناس ........ مدري غباوة منه وألا لقافة ماهو بداري عن تدابير الأنجاس .......... اللي بمهنتهم فجور وحرافة اللي على العالم يحدون الأمواس ......... لقتل الضمائر بالبدع والخرافة ماباس ياللي ماتنبهت ماباس ......... متى تنبه للوضع ياحسافة قصيدة : سعد عواض العزيزي |
قصيدة بعنوان ( الرجل ) ل/ سعد عواض العزيزي
الصمت حكمة خير من بعض الأقوال ... اللي تحطك في محل النقادة والمرجلة ماتنعطي كل رجال ... صعبة و ما تاتي بضعف الإرادة ما تأتي الا بالمكابد والأفعال .... واللي زرع زرعن يحصل حصاده الرجل كالصندوق مقفول بأقفال ... يعرف إذا صار يتكلم زيادة ويصنفه هرجه على كل الأحوال ... اما نجح والا اتصف بالبلادة اما يصير الرجل مضرب للأمثال ... بالطيب والنخوة وصبر وركادة وألا طلع ضائع مخيب للآمال ......... لا به حياه ولا يقدح زناده وألا من اللي فالزمن حافظ أموال ... وعينه يدربيها سوات الجرادة في مسلك المعروف ما يدفع ريال ... يالله دخيلك من حياة القرادة بعض البشر في جمع الأموال عمال ... وياهقوتي ماهم بويا السعادة المال بيد ين أهل الطيب فعال ... بيدين ناسن تستحق الإشادة تسعى لفعل الخير مع زين الأعمال ... اللي يتوجها بصدق العبادة هذا بما معناه حيث المثل قال ... ( التجربة توزن بوزن الشهادة) للشاعر سعد عواض العزيزي |
صح لسان الشاعر سعد عواض العزيزي وصح نقلك اخوي نجم مطير
قصايد كلها جزاله ولاغرابه في الجزاله من شاعر الجزلات تم نقل كل قصايده في هذا الديوان لتكون مرجع له ولمن يتابعه وياليت شاعرنا سعد ينزل قصائده بنفسه وينسقها حتى يظهر جمالية القصيده اكثر |
قصيدة وطنية للشاعر سعد بن عواض العزيزي بمناسبة اليوم الوطني ، نهديكم هذه الابيات المتواضعة ، فالوطن يستحق منا كل تضحية وكل بذل للغالي والنفيس من أجله والوطن يستاهل أكثرمن قصيدة : هـــذي قصيـدة جسـدت خير موضوع حب الوطن مـن شاعـرن مخلصن لـه حب الوطـن في القلب ثابت ومطبوع و من ؟ مـا يحب بــلاد الإســلام كله مرحوم ياعودن غرس جذع وفروع وأسس كيانن شـامخن شـاهـدن لـه بعـد التشتت والنزاعــات و الجوع والتفـرقـة و المبدعـات المضلـة ثبت قــواعـدها على الدين متبوع دستــورهـا القــرآن منهج و ملــه واستبشرت له جات بالسيف والطوع وتوحــدت صـارت تحت كنف ظلـه وساد الأمن وأصبح بها حق مشروع و نشربـهـا التعليـم دقـه وجلـه |
صح لسان الشاعرسعد عواض
وسلم نقلك اخي نجم مطير |
بمناسبة تهديد روسيا للمملكة العربية السعودية هذه قصيدة للشاعر سعد عواض العزيزي: يالمملكة حاميك رب السموات === من كل كيد وكل نية ردية يامنبع الإسلام خير الرسالات === حوت لبيت الله ومسجد نبيه رايتك مرفوعة على كل رايات === مضمونها توحيد رب البرية لوهدد الروسي بتوجيه ضربات === لبلادنا ثاروا رجال الحمية حنا جنود الحرب وقت المهمات === ماهمنا الروسي ومليون زيه أفعالنا ترعب عدانا بلحظات === فينا الشجاعة والعزائم قوية حنا بحكمتنا نخوض الصراعات === هل تذكر الأفغان ذيك السنية ولنا مع الشيشان فزعة ووقفات ===بأسبابها كبرت عليك القضية وقت الحروب الطاحنة والنزاعات === حنا سند للأمة اليعربية كم جاهلِ مثلك هتف بالهتافات === وفي حربه اهديناه موته هدية على الجهادنسوق منا بشارات === والله مانخشى الموت في كل هية الحمدلله من عدانا شهادات === شهادة إنا مانهاب المنية |
قصيدة ( وزن الذرة ) شاعر سعد عواض العزيزي واحدن مابه حيا لوكان وزن الذرة === والخساسة و النذالة ممتلئ مكياله لايزيد الناس خير ولايكافي شره === يحسب إنه مختفي ماينكشف بأفعاله كم تغاضينا عنه مرة تلتها مرة == = قبل نكشف معدنه و انزله منزاله نعرف إن التذل تغلي وسط قلبه حرة == = وتحمل الأفكار عنده نية ِ بطالة مادرى إن الناس تعرف تردعه وتضره === وراعي الدرب الردي دائم قصار حباله لو تجي ساعة وغى تسمع لصوته صرة === مامعه حتى استطاعة عن حماية حاله |
صفات الرجولة قصيدة الشاعر سعدعواض العزيزي يابنت أنا رجل الخشونة شعاري *********والرجل تظهربه صفات الرجولة بعض الشباب بهيئته خنفشاري ********* مغرور في حاله بعرضه وطوله وأغلبهم اللي يشبهون العذاري ********* ولا يتبع سنة محمد رسـوله دلع غنج ومن النساء به مواري ********* مايستحي والناس تنكرفعوله في رأسه البكلة يلف الحواري ********* مثل الفتاة تحوم الأنظار حوله أستغفر الله كان ماهو بداري ********** متأثرَِ بالغرب شكله وزولـــــــه |
الكبر قصيدة للشاعر سعد عواض العزيزي وش فيك يالإنسان تتكبر وأصلك من تراب === ياويل نفسِ من مزاياها الكبر ياويـلها مخلوق بالدنيا تعبدالله وتخضع بالجناب === والنفس بيدين الإله وبالهدى ندعي لها أبشرك بالخير يالمظلوم في يوم الحساب === تأخذ من الحسنات واذنوبك عليه تشيلها دنيا تراها دانية يالله عساها للخراب === من باعها بالآخرة نفسه نبا نهني لها ما أقشرك يادنيا بعد لذاتها أشد العذاب === ماتنفع الإنسان لو يسعى ورى تحصيلها المسعد اللي يطلب الجنة يدور للثواب === ماهمته لو جاتله بأبهى صور تجميلها |
قصيدة الوالدين للشاعر سعد عواض العزيزي : قضى ربي بحق الوالدين بعد تعبد إله العالمين بإحسانك لهم دنيا ودين *** ألا يالله ترحم والدينا لهم منا المحبة والوفاء وتقديراً لفعل الأوفياء بطاعتم رضا رب السماء *** ألا يا الله ترحم والدينا لهم حق علينا في الرقاب بأن نخضع لهم كل الجناب ونطلب من مدبرنا الثواب *** ألا يالله ترحم والدينا رعيتونا ونحن في المهاد على نهج الشريعة والرشاد يجازيهم بها رب العباد *** ألا يالله ترحم والدينا فقد ضحوا بكل مايملكون بروح ومال غالي يدفعون ولو نمرض علينا يسهرون *** ألا يالله ترحم والدينا ياويل اللي عقوق لوالديه ترى ربه بها يغضب عليه ويخسر كل شيءِ من يديه *** ألا يالله ترحم والدينا |
قصيدة مدح للشاعر سعد عواض العزيزي :
باسم الذي يسلخ نهاره من الليل = وتتابعت في دورةٍ مستديمة أبدأ كلامٍ قبل هالوقت ماقيل = مثله بتنسيقه يامال الغنيمة كلام حكمة فيه موجز وتفصيل = واليوم أقوله بعد جات العزيمة سلام ردة للرجال الحلاحيل = اللي لهم في القلب وزعة وقيمة متوارثين المجد جيلٍ بعد جيل = كلٍ شهد به من عصور ٍ قديمة يوم الهنادى والسيوف المصاقيل = أفعالهم بين القبائل عظيمة وهامات تبلغ قمة الجدي وسهيل = معها تواضعهم ونخوة وشيمة أهل الوجيه المسفرات المهاليل = اللي على إكرام النشامى محيمة وأهل الدلال الصفر والبن والهيل = ومجالسن فيها الطراقي مقيمة والبن الأشقر وسط بيض الفناجيل = والزعفران يبث ريحة عديمة وذباحةٍ للضيف من عقـرن حيل = يوم المجاعة والحياة الأليمة يستاهلون المدح قوم ٍ مشاكيل = أهل السلوم الطيبات السليمة هذا كلام الصدق من غير تبديل = وانا بعمري ما نطقت الظليمة |
صح لسانك اخي الشاعر سعد عواض
متاااااااااااابع تحياااااااااتي |
بارك الله فيك أيها المبدع والشاعر والمراقب المميز ( الليث) ونشكر لك مرورك على المتصفح ومتابعتك ونقول صح لسان الشاعر وصحت بدنك
اخوك الواثق |
قصيدة للشاعر سعد بن عواض العزيزي في أهل جدة ياأهل جدة لاتضيقون من بعض الكلام & لو أقوله كل واحد يجي غي خاطره لا زيارة لا توا صل ولا حتى سلام & كلكم فيها وكن العباد مسافرة كل واحد في سبيله مسوي له نظام & بس مدري عن هذا الصد وشلون آخره وإن نشدته قال مشغول في هذا الدوام & والدوام أوقات ماهو مسيرة سايرة وين رفقتكم ووين الرياجيل الكرام & وين راحت راعي العذر ممكن نعذره |
قصيدة للشاعر سعد بن عواض العزيزي بعنوان ( المفاهيم ) الخلوق مع البشر يزداد قدر وهيبة & والبذاءة تخرج الانسان من تقديره ليش يحكم بالضعافة لأجل زود الطيبة & الخطأ فيمن حكم والضعف في تفكيره الصواب أصبح خطأ والمخطيات مصيبة & من منح بعض العقول الإذن في تغييره المفاهيم أصبحت تختل في التركيبة & أوقفوا سير الخطأ لاينتشر تأثيره أيقظوا حي الضمير وفعلوا تأنيبه & لأجل تصحوا همته ويساعده تعبيره ماسلم من مفردات طمسته التغريبه & وأصبح التفسير غير ومختلف تفسيره |
درر سطرت بما الذهب
حكم ومواعظ بطيات ابياتك الشيق صح لسانك وسلم بنانك يالواثق |
قريت في أخبار الصحف والمجلات ====== عن موقف إنساني ومن عزوة مطير وقريت الاسم اللي صدر منه بالذات ======= وعرفته اسم سطر المجد تسطير ثامر بن سليمان والله سلامات ========وربي حماكم من شرور المقادير وماهي غريبة من رجال المهمات =========متوارثين المجد والطيب والخير وذوي مثيب إلهم رفيع المقامات =======من غير قاصر في الرجال المناعير وربعي بني صوان لن جات فزعات ========في وصفهم تعجز حروف التعابير بني عزيز إلهم مع المجد وقفات ======== على النقاء معهم شهود وتقارير شعر سعد عواض العزيزي |
صح لسانك اخوي سعد
ابدعت في النص الجميل ويستاهل ثامر بيض الله وجهك |
صح بدنك وبيض الله وجهك يا أبا فيصل
|
سعد عواض العزيزي - قصيدة التقاعد
قصيدة (التقاعد) للشاعر الأستاذ / سعد بن عواض العزيزي ابكتب من الأبيات واكتب من الأشعار ==== وأنا شاعر تسمع جميع البشر شعره اسطر بيوت الشعر ومن البحور أختار ====== وانقي كلام ٍ صدق منحوت من صخرة لمن قدرهم في قلوبنا طابع ٍ تذكار ==== ==== من العلم والأخلاق والطيب والخبرة إذا جيت أوصفهم باقول الكبار كبار ==== ==== كبارٍ وكلن بينهم عالي قدره لو أكتب من الأشعار ما تكفي الأحبار ==== == يجف القلم من وصفهم ينتهي حبره كسبنا من الأخوة تجارب وبعد أنظار ==== تسجل لهم والطيب ما يختفي ذكره يا ليت الليال تعيد ونكمل المشوار ==== لكن التقاعد شيء مفروغ من أمره نكمل مسيرتنا السعيدة مع الأخيار ==== وكلن من أهل المعرفة متقن دوره تدور الليالي مسرعة والفلك دوار ==== ولنا في جميع اللي نشاهد لنا عبرة بعد ودعونا دمع عيني يهل أعبار ==== ولكن أخفي حين تخنقني العبرة عسى الله يعين اللي على ماحصل صبار ==== وعسى الله يثيبه بالأجر إن نفذ صبره |
سعد عواض العزيزي بقصيدة ( فكر إرهاب)
سعد عواض العزيزي بقصيدة ( فكر إرهاب) ابتدئ بالواحد المعبود وهاب النجائب ============== خالق الإنسان سبحانه عليم ٍ بالخفايا مبدع الإنسان في التصوير وبخلقه عجائب ========== ومحصي أعمال العباد مدبر أحوال البرايا يهدي العاصي ويقبل توبة اللي جاه تائب ========== مـُبدل السيئات بالحسنات وأنعم بالمزايا نشكره نثني عليه اللي غمرنا بالوهائب =========== ديننا الإسلام ثم العلم في شتى القضايا وحقنا إنا ننشر التعليم ونصد الشوائب ============= ضد من جانا بفكر إرهاب ينوي به نوايا استعدينا تحصنا ولا فيها غرائب ===== ========= ننهج النهج الصحيح ونروي عطاش الحنايا ياشباب الدين : هبـوا بلغوا حاضر وغائب == =========== إننا قوة تهز الصخر مانخشى الرزايا إن تمسكنا العقيدة مانخاف من المصائب ================= مالنا وأرواحنا لله نهديها هدايا في سبيل الله نحارب صف شبانٍ وشائب ============ الرجال اللي يقودون الكتائب والسرايا وفي الختام أختم وأصلي عد ذعذاع الهبائب ========= للنبي الهادي المعصوم من كل الخطايا |
صح لسانك اخوي سعد
لله درك |
سعد عواض العزيزي قصيدة بني عزيز
قصيدتي :: بني عزيز :: الشعرمن فيض المشاعر بنيناه :: فيه الحقائق والكلام الثميني يهتاض بالي يوم أغني بمبداه :: عن ربعي اللي تتعب الواصفيني بني عزيز أهل البيوت المبناه :: على الكرم ومقابل الطيبيني صغيرنا من نشأته حافظ وصاه :: إن الكرم من شيمة المسلميني فينا الكرم موجود والضيف يلقاه :: كرام والله أكرم الأكرميني ودون الخوي والضيف والجار والجاه :: لأرواحنا من دونها باذليني منا خوي الذئب والذئب خاواه :: وعشاه من زاده ومتعايشيني وبعدين راح الذئب وأسرع وعشاه::وأحضرله الكبش المربى السميني ومشى معه في مسلكه لين منهاه :: ونحر ذلوله وأنذر القاطنيني ويقول هذا الذئب لا أحد يتنصاه :: خوي عامر وأخبر الغايبيني ولكن مقرود رمى الذيب ما أخطاه :: وقام يتباها بالكلام المشيني و بته خوي الذئب سرعة ووطاه :: نصرة خويه والعرب خابريني وإن عودت للحرب وقت المثاراه :: ربعي هل الطالات في كل حيني تاريخنا شاهد و لو ما كتبناه :: بأفعالنا اللي مع مدار السنيني منهاابن باشامصطفى اللي كسرناه: في حجريوم أغوي من الطامعيني ومنها الأحيمر بإذن ربي نصرناه :: وعادت له اللي تقري الغانميني يوم أعتزى بآلاد وائل وجيناه :: انشد رجالٍ للقصص حافظيني أخو رضية قال له شعر وأطراه :: يم العلم يوم لحقوا مسرعيني أدنى العلم وأدنى عسيلات وأقصاه :: تشهد بموقفنا وفعلٍ يبيني وجنب الرحيل الذود منهم خذيناه :: ويم البويرة لحقوا الآخريني وسعدي وساعد فعلهم مانسيناه :: بشجاعةٍ تحتاج لمؤرخيني والفارس رضيان من فعل يمناه :: كم فرقت جمع العداء المغرضيني وتاريخ نجم وناجم اللي عرفناه :: رووه لنا أجدادنا السابقيني وفعل الغريب محمد اللي سمعناه :: هزم عداه وردهم مفلسيني وريع الخريص اللي مقفل فتحناه :: بعزم الرجال وحكمة الراشديني ومع الرواشد فعلنا اللي فعلناه :: يشهد به الأقصين والأقربيني واللي غزانا فالخفيق اكتسحناه :: فعل العبادل يرهب المعتديني ووادي المحلل به عدوٍ هزمناه :: مع عون جينا لأجلهم فازعيني وفي هيئة المبرك وذودٍ حميناه :: وشواهده قول الثقات اليقيني من شعر سيف الله من النار ياقاه :: وعساه فالجنة من الساكنيني (تسعة عزايزتن عشاهم شنق شاه ::هاشوايجون أمية وقيس أربعيني من الصبح لين العصر مالت فياياه :: وهمه على غير الرضا موقفيني وحنا حماة الوجه والجار نحماه :: إن جات حزات القسا مانليني ) هذا كلامه من قصيده رويناه :: والله شاهد والبشر شاهديني وهذا قليلٍ من كثير ذكرناه :: لجيلنا و أحفادنا اللاحقيني ما همنا ألا ربنا نطلب رضاه :: نركع ونسجد له مع الساجديني وبالدين منهاج الرسول اتبعناه :: سنة محمد خاتم المرسليني صلوا عليه وسلموا عند طرياه :: شفيع الأمة في النهار المبيني الشاعر: سعدعواض المزرمي العزيزي |
كفو سعد شوفو قصيده وبقراه
شعره مع الي غاب والحاضريني يسلم نقلك يالواثق |
| الساعة الآن 01:21 PM. |
Powered by vBulletin® Version 3.8.4
Copyright ©2000 - 2025, Jelsoft Enterprises Ltd
"جميع المشاركات المكتوبة تعبّر عن وجهة نظر صاحبها ... ولا تعبّر بأي شكل من الأشكال عن وجهة نظر المنتدى "