لا غبت عني وانا مشتاق وش عذرك=يوم انت حالف بربك .. ما تخليني !!

نذر على رقبتي .. ونذرا مهو نذرك=انك ما حسيت في شوقي ولا فيني

مسافة الشوق .. لـ المشتاق تختصرك=وتوزعك في حشاي .. وفي شرايني

غطت ثلوجك طبوعك واختفى جمرك=ما عادك اللي ليا من غبت .. يدعيني

افكر اختبرك .. واخاف لـ اختبرك=اخاف باقي غلاك .. يطيح من عيني

تعال بين الضلوع العوج .. شف قدرك=قصر من الحب .. يبنى لك ويبنيني

ما ودي اقول في بعدك .. غريب امرك=ودي لو اسمع صدا ( يا من يراعيني )

اعتبرك الروح .. ولا شتبغي اعتبرك=ما دمت يا اغلى الخلايق مني وفيني

انا اكثر انسان .. قدرّ قلبك وطهرك=وانت اكثر انسان فاهمني ومغنيني

مأسور بالحب .. لكن افتخر بأسرك=كبلت قلبي قبل لا تكبل ايديني

فالليله المظلمه .. يكفي سنا بدرك=وفالليله البارده .. قربك يدفيني

قدلي وانا احاولك وآقف على نهرك=ارويتني مره .. وناظرك ترويني

لقاك وحكاك والجو ان خذا عطرك=ثلاثة اشياء .. تقتلني وتحييني

خذني من الناس .. وادخلني وسط صدرك=لا تخلي البعد ياتي بينك .. وبيني

تقول لي يا فديت عيونك وشعرك=وقصايدي فيك .. ذكراها مشقيني

ماني بهتم .. ( كم عمري , وكم عمرك )=عطني سنينك وانا بهدي لك .. سنيني

كم لي وانا احتاج لك واشتاق وانتظرك=واتذكر آخر لقا وايديك بايديني

يا كبر تقديرك بقلبي .. وكبر اجرك=لا جيتني بالوصال وشافتك عيني