ياللي غيابك طال وبحقي أخطيت =هذا شهر ماأشوف للوصل نيه
هن كانن اسبوعين لكن تماديت= في غيبتك كنك موصى وصيه
لعبت باعصابي ولا قلت مليت= لا راح يوم اقول باكر مجيه
الله ياني في غيابك تحريت =اثر المفارق صعب ماهو شويه
عقبك مشاويري من البيت= للبيت اخاف لا دقيت ماني هنيه
عانيت انا في غيبتك حيل عانيت = يابغضني للبعد لا رحم حيه
هذا شهر وش عاد لو انك ابطيت= والله ان تلقالك هنيه ضحيه
البارحه ما بين يمكن ويا ليت= وابليس يتركني ويرجع عليه
فكرت لو طول غيابك ولا جيت= يعني كذا روحه ومن غير جيه
خانتني الدمعه وطاحت وصديت =ملعون ابو التفكير يذبح خويه